Ghazal 19: tuhmat-o-ilzaam bhee hai, kulfat-o-aalaam bhee

• Roman
• Devanagari
• Urdu

tuhmat-o-ilzaam bhee hai, kulfat-o-aalaam bhee
kis qadar vehshat.zadah hai 'ishq kaa anjaam bhee!

kaam apnaa kar gayee yooN hasrat-e-naakaam bhee
chain ab dil ko naheeN hai, kho gayaa aaraam bhee

kaash koi le ke aaye ab mai-e-gulfaam bhee
aik muddat ho gayee hai rehke tishna.kaam bhee

haasil-e-qaid-e-jahaaN kyaa, ab yeh mujh se poochiye!
subh ashk-e-bekasee, to ashk-e-Gham har shaam bhee

zindagee kee rahguzar meiN kyaa bataayeN kyaa milaa?
be.qaraari har qadam par, be.basi har gaam bhee

is se baRh kar aur kyaa hogaa muhabbat kaa suboot?
dil meiN us kee yaad bhee hai, lab par us kaa naam bhee

aarzoo, hasrat, tamanna, aas, Khwaahish aur umeed!
chhoR deN yaaraan-e-manzil, ab Khayaal-e-Khaam bhee!

le usee kaa naam Ghaafil, kar usee ki justjoo!
hai vohee aaGhaaz-e-ulfat aur vohee anjaam bhee

jab uThaaya maine aaNkhoN se hijaab-e-Khudsaree
tab huaa aazaad-e-zulmat.Khaana`e-auhaam bhee

kaun ab suntaa hikaayat ranj-o-Gham kee, dosto?
yooN to 'naadaaN' shehr meiN kehne ko hai badnaam bhee!


(AUGUST 27, 1999 - WICHITA, KS - USA)

Coming soon

Coming soon

Ghazal 18: "betaab hai dil dard-e-mohabbat ke asar se"

• Roman
• Devanagari
• Urdu

"betaab hai dil dard-e-muhabbat ke asar se" (1)
duniyaa ke sitam aur zamaane ki nazar se

dil jabr-e-masheeyat ki shikaayat to kare hai
lekin hai 'ilaaj is ka `agar` se, na `magar` se

har moR pe duniya meiN faqat ranj hi kyoN hai?
poochhe to koi is ka sabab ahl-e-hunar se!

yeh dil hai tiraa, jism tiraa, jaaN bhi hai teree
jaaooN to kahaaN jaaooN maiN uTh kar tire dar se?

ik baar to mujh par bhi paReN teri nigaaheN!
ik baar to rehmat ki ghaTaa TooT ke barse!

go chup hai zabaaN, dil mira pathhar to naheeN hai
har dard numaayaaN hai miraa deeda`e-tar se

ik 'umr se hooN maiN bhi talabgaar-e-masarrat
ai dil, jo use laaooN to laaooN maiN kidhar se?

yeh dasht-e-junooN aur yeh raatoN ki siyaahi!
kyaa jaaniye kyaa soch ke niklaa tha maiN ghar se!

ai kaash, k. mil jaaye kaheeN manzil-e-maqsood
jee bhar gayaa 'naadaaN' miraa is raahguzar se

AUGUST 15, 1999 - WICHITA, KS - USA

(1) "Shakeel" Badaayuni

Hindi Here

Urdu here

Ghazal 17: kaarzaar-e-junooN meiN aaya hooN

• Roman
• Devanagari
• Urdu

kaarzaar-e-junooN meiN aaya hooN
hosh ko kab ka maiN bhulaaya hooN

zindagi kee har aik manzil par
apni qismat ko aazmaayaa hooN

gar naheeN sabr ab to kyaa keeje?
har qadam par jo maat khaaya hooN

jaan leni hai gar to le jaao!
aik muddat ka maiN sataaya hooN

zindagi pur.kashish to hai, lekin
zindagi se fareb khaaya hooN

voh faqat ik Khayaal-e-GHaib naheeN
apne dil meiN use basaaya hooN

daulat-e-'ishq, pyaar ke tohfe
dekh kyaa tere dar pe laaya hooN!

log paiham savaal karte haiN --
tang kyoN zindagi se aaya hooN!

jab kabhi uski yaad aayee hai
aas kaa deep phir jalaaya hooN

uske aane ki ik KHabar sun kar
anjuman anjuman sajaayaa hooN

baaNT kar dil ki saari jaageereN
apni hasti ko Khud miTaaya hooN

kyaa 'ajab raasta hai irfaaN kaa!!
KHud ko kho kar hi KHud ko paaya hooN

yeh to dil kee zubaan hai, naadaaN
tum ko ab tak jo maiN sunaaya hooN

(AUGUST 02, 1999 - WICHITA, KS - USA)

Coming soon

Coming soon

Ghazal 16: mahabbat ki kaisi 'ajab daastaaN hai

• Roman
• Devanagari
• Urdu

mahabbat ki kaisi 'ajab daastaaN hai
sukooN kee hai soorat na koi amaaN hai

shab-o-roz faryaad-o-aah-o-fuGhaaN hai
k. goyaa 'azeeyat yeh 'umr-e-ravaaN hai

kabhi fikr-e-duniyaa, kabhi fikr-e-'uqbaa
isi kashmakash meiN to saara jahaaN hai

hai do din ki yeh zindagaani rafeeqo,
kise phir KHabar hai k. jaana kahaaN hai?

tilism-e- Gham-e-aarzoo ko to toRo
naheeN sood is meiN, ziyaaN hi ziyaaN hai

Khud apni hi taqdeer par rone vaalo -
'abas hai shikaayat, gilaa raayegaaN hai

zaraa Ghaur kar apne 'aamaal par ab
bohot saKht aage tira imtihaaN hai

use yaad kar le, use dil meiN dhar le
vohi ek sarkaar-e- kon-o-makaaN hai

haqeeqat to khul hi gayee tujh pe aaKhir
k. 'naadaaN', yeh duniyaa to vehm-o-gumaaN hai

(JULY 07, 1999 - WICHITA, KS - USA)

Coming soon

Coming soon

Ghazal 15: kyaa bataaooN kis qadar jeenaa miraa dushvaar thaa

• Roman
• Devanagari
• Urdu

kyaa bataaooN kis qadar jeenaa miraa dushvaar thaa
zindagi ki raah par jab har qadam pur.Khaar thaa!

ibtidaa-e-'ishq meiN dil mustaqil sarshaar thaa
intihaa meiN jaane kyoN har shai se maiN bezaar thaa!

har qadam ashk-e-nadaamat, har nafas aah-o-bukaa
zindagi kee har ghaRi guzri k. jaise baar thaa

shikva`e- be.mehri-e- ahl-e-zamaana kyaa karooN?
"ranj to yeh hai k. maiN apni nazar meiN Khwaar thaa" (1)

kis se kehtaa, kaun suntaa daastaan-e-dard-e-dil?
jab miraa koi shareek-e-Gham, na koi yaar thaa

is se andaazaa lagaayeN dil ke ujRe haal kaa
jo bayaabaaN ab hua hai, yeh kabhi gulzaar tha!

yooN pashemaaN ho ke 'naadaaN' kyaa milegaa - kuchch bataa!
tu ne un kaa dil dukhaaya, jinko tujhse pyaar thaa

(JUNE 09, 1999 - WICHITA, KS - USA)

(1) "Noor" Shrivastav

Coming soon

Coming soon

Ghazal 14: kyaa niraala dehr kaa dastoor hai

• Roman
• Devanagari
• Urdu

kyaa niraala dehr kaa dastoor hai
har koi aa kar yahaaN ranjoor hai

bekas-o-bechaara-o-ma'azoor hai
aadmi to fitratan majboor hai

ibtidaa to 'ishq ki pur-lutf thi
intihaa kyoN dard se bharpoor hai?

DhooNDne par bhi to kuchch milta naheeN
raaz chashm-e-shauq se mastoor hai

maine kyaa dekhaa tha ik jalvaa tiraa
ab talak yeh dil miraa maKhmoor hai

kaash batlaaye koi is kaa sabab
kaun jaane husn kyoN maGhroor hai?

dekh to, pardaa uThaa kar ab zaraa
har taraf phailaa huaa ik noor hai

Khwaab-e-Ghaflat se to ab bedaar ho
dekh, duniyaa barq.zaar-e-toor hai

hai taGhayyur.kesh rang-e-zindagi
bas yehi ik daa'iami dastoor hai

haiN "an al Haqq" kehne vaale be.shumaar
in meiN lekin ek hi "Mansoor" hai (1)

chhoR de vaa'iz, naseehat hai 'abas
log kehte haiN ke "dilli door hai!"

laakh charche ho rahe haiN aaj kal
ab to 'naadaaN' shehr meiN mash_hoor hai

(JUNE 03, 1999 - WICHITA, KS - USA)


(1) Reference to "Mansoor Hallaj" who was hanged
for declaring openly "anal HAQ" (I am the TRUTH),
a very common Sufi concept of mysticism - exploring
the SELF as a means to the Absolute..

Coming soon

Coming soon