Ghazal 29: maqsad-e-yak zindagaani chaahiye

• Roman
• Devanagari
• Urdu

maqsad-e-yak zindagaani chaahiye
'ishq ki koi nishaani chaahiye

dil ko ab sheereeN bayaani chaahiye
aur phir uski zabaani chaahiye!

zehr ab lagne lagi hai zindagi!
mujhko marg-e-naagahaani chaahiye

dil ka kyaa hai - TooT jaayega abhi
"dostoN ki mehrbaani chaahiye!" (1)

toR kar yeh halqa`e-Gham, ab mujhe
ik nishaat-e-jaavidaani chaahiye

dil taRaptaa hai musalsal aaj kal
jaise sehraaoN ko paani chaahiye!

zindagi ke sab maraahil par mujhe
ik kaleed-e-kaamraani chaahiye!

kyaa qayaamat thi nigaaheN jab mileeN!
yooN balaa-e-aasmaani chaahiye!

jis tarah thaa uski yaadoN ka Khumaar
phir vohi KhooN meiN ravaani chaahiye

phir dar-e-jaanaaN ko jaata hai Khayaal
kuchch to vajh-e-shaadmaani chaahiye...!

yaad haiN bachpan ke afsaane mujhe
phir woh pariyoN ki kahaani chaahiye

'umr-e-rafta ka hai 'naadaaN' kyaa gila?
kyaa tujhe phir nau.javaani chaahiye?!

(MARCH 24, 2001 - ARLINGTON, TX - USA)


(1) Abdul Hamid Adam

Coming soon

Coming soon

Ghazal 28: shikva hai, sitam hai to kabhi jaur-o-jafaa hai

• Roman
• Devanagari
• Urdu

shikva hai, sitam hai to kabhi jaur-o-jafaa hai
kyaa Khoob zamaane meiN mohabbat ka silaa hai

ik 'umr guzaari to pataa mujhko chalaa hai
kehte haiN jise 'ishq, yeh dar.asl balaa hai

ai chaaragaro, mujhko mire haal pe chhoRo,
is Gham ka madaava na dua'a hai na davaa hai

badlaa hai bhalaa pehle bhi dastoor-e-zamaana?
"hai dasht wohi, aur wohi aabla.paa hai" (1)

har shab ki tarah ab ke bhi jaaga hooN maiN shab bhar
us ne jo yahaaN aane ka ik va'ada kiyaa hai --

irfaan-e-haqeeqat se munavvar jo huaa dil
ma'aloom huaa yeh k. har ik samt Khudaa hai

har manzar-e-fitrat pe jabeeN jhukti hai meri
yeh tarz-e-'ibaadat mira har ik se judaa hai

us shaKhs ka afsaana sunaaooN bhi to kaise?
har gaam pe duniya meiN jo mar mar ke jiyaa hai

afsurda-dili, zaKhm-e-jigar, Khoon-e-tamanna
kyaa dehr meiN naadaaN tujhe kuchch aur milaa hai?

(1) Sarwar Alam Raz "Sarwar"

(FEBRUARY 12, 2001 - ARLINGTON, TX - USA)

Coming soon

Coming soon

Ghazal 27: dil meiN hai umang

• Roman
• Devanagari
• Urdu

dil meiN hai umang
phir se hai tarang

daam-e-'aashiqi
halqa`e-nahang!

meri zindagi
ik kaTee patang

maiN hooN baa.vafaa
kyoN jahaaN hai dang?

'aql-o-hosh par
kyoN lagaa hai zang?

hai nigaah-e-yaar
goyaa ik Khadang

yaad kaa Khumaar
ho sakaa na bhang (1)

dil hai 'aql se
aaj mehv-e-jang

mujh se yooN hijaab!?
dil hai yaa k. sang!

dard-e-dil ke bhi
muKhtalif haiN rang

mustaqil malaal!
dil hua hai sang

dil ki dhaRkaneN
jaise ik mridang!

saaNs, nabz-o-jaaN
nai, rabaab-o-chang!

zindagi se ab
aa gayaa hooN tang!

sust haiN qadam
itna kyoN dirang?

(FEBRUARY 12, 2001 - ARLINGTON, TX - USA)

(1) bhang hona = Hindi, to be broken/destroyed
(as in "tapasyaa bhang honaa" -- not to be confused with the opiate!)

Coming soon

Coming soon

Ghazal 26: un se ab visaal?

• Roman
• Devanagari
• Urdu

un se ab visaal?
yaa Khudaa! kamaal!

hai yeh dil ka haal
soz, Gham, malaal!

us ki yaad meiN
guzre maah-o-saal

ik adaa-e-Khaas
unki be.misaal!

Gham ho yaa Khushi
kab hai 'eitdaal?

kyoN naheeN sukooN?
lab pe hai savaal

yeh anaa ka ra'ub
dil se to nikaal

do ghaRi ko hai
husn aur jamaal

ab pataa lagaa
zeest hai vabaal

naGhma`e-firaaq
sur hai ab na taal

phir se 'aashiqi!?
dil zaraa saNbhaal

ik usi ka hai
husn-e-laa.zavaal!

mil gayee Khushi
maiN hooN maalamaal!

kaainaat-e-"kun"
ek maaya.jaal!

aur kyaa kahooN!?
Gham se hooN niDhaal!

mujh ko ab naheeN
taab-e- qeel-o-qaal!

bas, Khamosh ab!
chhoR yeh Khayaal!

(FEBRUARY 12, 2001 - ARLINGTON, TX - USA)

Coming soon

Coming soon

Ghazal 25: sar pe hai savaar

• Roman
• Devanagari
• Urdu

sar pe hai savaar
'ishq kee pukaar

dil ke ho gaye
raaz aashkaar

aaye dar chaman
kaash, ab bahaar!

dil ka khel hai!
yaaro, zeenhaar!

bahr-e-zindagi
kaise ab ho paar?

dil se dil ka hai
naata ustuvaar

tanha jheltaa
hooN jahaaN ka baar

saaz hai Khamosh
TooTa dil ka taar

"teera hai naseeb" (1)
Gham ka hooN shikaar

meri raah meiN
hai faqat Ghubaar

hasratoN ka hai
dil meiN ik mazaar

ab qazaa ka hai
mujh ko intizaar

husn cheez kyaa?
aur kyaa nikhaar?

hai 'abas rafeeq
dil ka kaar-o-baar

ik hai gar Khushi
Gham haiN sad.hazaar!

miT chukaa hai ab
zeest ka Khumaar

hai mayassar ab
dekh, iKhtisaar!

(1) 'Karaamat' Gardezi

(FEBRUARY 12, 2001 - ARLINGTON, TX - USA)

Coming soon

Coming soon

Ghazal 24: shab ko mahtaab naheeN, subh' ko Khursheed naheeN

• Roman
• Devanagari
• Urdu

shab ko mahtaab naheeN, subh' ko Khursheed naheeN
haaye voh zeest, kih jis meiN kaheeN ummeed naheeN!

ba'ad ik 'umr ke yeh 'uqda khulaa hai mujh par
taalib-e-deed to hooN, mustahaq-e-deed naheeN

kyaa kahaa aap ne? ik baar to phir se kahiye
voh kare, aur meri baat ki taa'eed? naheeN!

voh ho maujood to har roz hai roz-e-barakat!
voh agar saath na ho, 'Eid bhi phir 'Eid naheeN!

lab par us kee hi sanaa, dil meiN hai us kaa hi Khayaal!
phir bhi duniyaa ka hai israar: yeh tauheed naheeN!

jaane kyoN ab bhi usee se hai vafaa kee Khwaahish
jis se ulfat ki ko'ee soorat-e-tajdeed naheeN!!

us pe zaay'a na gayaa jins-e-giraaN.maaya`e-'ishq
tajriba Khoob thaa -- is baat ki tardeed naheeN!

ahl-e-minbar bhi Khilaaf, ahl-e-KhumistaaN bhi Khafaa
dil-e-bad.baKht! kahaaN par tiri tanqeed naheeN?

chaak-e-daamaan-e-Khirad, chaak-e-gireebaan-e-anaa
voh junooN kyaa hai, 'ayaaN jis meiN yeh tajreed naheeN!?

chal kaheeN door tu is shehr se 'naadaaN,' kih yahaaN
rasm-e-ulfat ka ko'ee banda`e-taqleed naheeN!


(DECEMBER 25, 2000 - ARLINGTON, TX - USA)

शब को महताब नहीं, दिन को भी खुर्शीद नहीं!
हाए वो ज़ीस्त, कि जिस में कहीं उम्मीद नहीं!

बाद इक उम्र के ये उक़दा खुला है मुझ पर
तालिब-ए-दीद तो हूँ, मुस्तहक़्क़-ए-दीद नहीं!

क्या कहा आप ने? इक बार तो फिर से कहिए:
वो करे, और मेरी बात की ताईद!? नहीं!!

वो हो मौजूद तो हर रोज़ है रोज़-ए-बरकत
वो अगर साथ न हो, 'ईद भी फिर 'ईद नहीं

लब पर उस की ही सना, दिल में है उस का ही ख़याल
फिर भी दुनिया का है इस्रार: ये तौहीद नहीं!

जाने क्यों अब भी उसी से है वफ़ा की ख़्वाहिश
जिस से उल्फ़त की कोई सूरत-ए-तजदीद नहीं

उस पे ज़ाया' न गया जिन्स-ए-गिरांमाया-ए-इश्क़
तज्रिबा ख़ूब था, इस बात की तर्दीद नहीं!

अहल-ए-मिंबर भी ख़िलाफ़, अहल-ए-खु़मीस्ताँ भी ख़फ़ा
दिल-ए-बदबख़्त! कहाँ पर तिरी तन्क़ीद नहीं!?

चाक-ए-दामन-ए-ख़िरद, चाक-ए-गिरेबान-ए-अना
वो जुनूँ क्या है, 'अयाँ जिस से ये तजरीद नहीं!

चल कहीं दूर तू इस शहर से 'नादाँ,' कि यहाँ
रस्म-ए-उल्फ़त का कोई बंदा-ए-तक़लीद नहीं


(DECEMBER 25, 2000 - ARLINGTON, TX - USA)

شب کو مہتاب نہیں، صُبح کو خورشید نہیں
!ہائے وہ زیست، کہ جِس میں کہیں اُمّید نہیں

بعد اِک عُمر کے یہ عُقدہ کھُلا ہے مُجھ پَر
طالبِ دید تو ہُوں، مُستحقِ دید نہیں

کیا کہا آپ نے؟ اِک بار تو پِھر سے کہئے
!!وہ کرے، اور مری بات کی تائید؟ نہیں

وہ ہو مَوجود تو ہَر روز ہے روز بَرَکت
وہ اگر ساتھ نہ ہو، عید بھی پھر عید نہیں

لب پَر اُس کی ہی ثَنا، دل میں ہے اُس کا ہی خیال
پِھر بھی دُنیا کا ہے اِصرار: یہ توحید نہیں

جانے کیوں اب بھی اُسی سے ہے وفا کی خواہش
جِس سے اُلفت کی کوئی صُورتِ تجدید نہیں

اُس پہ ضایع نہ گیا جِنسِ گراں مایۂ عِشق
تجربہ خُوب تھا، اِس بات کی تردید نہیں

اہلِ مِنبر بھی خِلاف، اہلِ خُمستاں بھی خفا
دلِ بَد بخت! کہاں پَر تری تنقید نہیں؟

چاکِ دامانِ خِرد، چاکِ گریبانِ انا
!وہ جُنوں کیا ہے، عیاں جِس میں یہ تجرید نہیں؟

چل کہیں دُور تُو اس شہر سے ناداںؔ، کہ یہاں
رسمِ اُلفت کا کوئی بندۂ تقلید نہیں


(DECEMBER 25, 2000 - ARLINGTON, TX - USA)