Sunday, February 18, 2007

Ghazal 52: bikhraa hai dil yeh TooT kar ulfat ki raah meiN




bikhraa hai dil yeh TooT kar ulfat ki raah meiN
qaabil hi ban sakaa tha kab us kee nigaah meiN!

kho dee tamaam 'umr sitamgar ki chaah meiN
ya'ani milaa na kuchch bhi mujhe rasm-o-raah meiN

kis kis tarah na guzri sapaid-o-siyaah meiN!
geh ashk meiN kaTee, gahe faryaad-o-aah meiN

hai taab maikade meiN, na dair-o-haram meiN chain
jaaooN to ab ke jaaooN maiN kis kee panaah meiN?

rakhta agar zaraa bhi mohabbat ka voh bharam
kaTtee na zindagi miri yooN ishtibaah meiN!

kyaa kyaa na dil pe 'ishq meiN guzri, na poochhiye!
roodaad kya sunaaooN maiN haal-e-tabaah meiN?

duniya se hai umeed, na apnoN ka 'eitbaar
talKhee bhari hai jab se lab-e-Khair.Khwaah meiN

kahiye zaraa, ab aisi bhi mushkil hai kyaa huzoor
mehr-o-'inaayat-o-karam-e-gaah.gaah meiN?

maiN qaa'il-e-vafaa hooN, voh aamaada`e-jafaa
itnaa bhi farq, kaash, na hota nibaah meiN!

Gham mehvar-e-hayaat hai, Gham markaz-e-hayaat!
seekhaa yehi hai dehr ki is dars.gaah meiN

shams-o-qamar bhi kyaa haiN bhalaa us ke roo.ba.roo!
tamseel us ke husn ki? Khursheed-o-maah meiN?

har manzar-e-hayaat hai 'aks-e-jamaal-e-yaar
hairaaN hai chashm husn ki is jalva.gaah meiN!

"phir jee meiN hai k. dar pe usi ke paRe raheN" (1)
nikle bhi dam to baargah-e-'aali.jaah meiN!

itnee hi fikr-e-zuhd hai 'naadaaN' tujhe, to phir
kar le qayaam jaa ke kaheeN Khaanqaah meiN!

(FEBRUARY 18, 2007 -- ARLINGTON, TX -- USA)

(1) Asadullah Khan "Ghalib"

---
In the zameen of at least 3 Ghazals written by
Ustad 'DaaGh' Dehlvi [1831 - 1905 AD] -- one of which
is as follows:

"tum laakh mujh se parda karo jalvagaah meiN
soorat yeh keh rahi hai kih maiN hooN nigaah meiN"





2 comments:

Unknown said...

Hi Rajiv, who as penned the lyrics of this beautiful ghazal? Regards, Suneeta Kaul

RC said...

I am the author of all the Ghazals posted on this blog. Sorry, I get no notifications for comments, so I just saw this.