Monday, January 31, 2005

Ghazal 45: saaqiyaa, laa kar mai-e-gulfaam ko




saaqiyaa, laa kar mai-e-gulfaam ko
Khatm kar de ab Gham-e-ayyaam ko!

de du'aaeN daur-e-Khush.anjaam ko!
saaGhar-o-meena, suboo-o-jaam ko!

dekh kar us sarv-e-seem.andaam ko
kho diyaa jaane kahaaN aaraam ko!

naala.dar.dil, aah.bar.lab, Gham.ba.dosh!
kyaa milaa hai chaah kar asnaam ko?

Gham jab apne hee kiye kaa hai silaa
kosiye kyaa charKh-e-neelee.faam ko?

Ghota.zan haiN behr-e-ulfat meiN sabhee
kis ne sochaa hai magar anjaam ko?

har bayaaN pur.pech itnaa kyoN huzoor?
door to keeje kabhi ibhaam ko!

chhoRiye saaheb! bhalaa kaisa mazaaq?
Khwaab-e-'ishrat?! is dil-e-naa.kaam ko?!

subh-e-nau kyaa jaaniye kyaa laayegi!
sochta rehta hooN maiN har shaam ko

kaamraani chaahiye gar 'ishq meiN
tark kar parvaa-e-nang-o-naam ko

jalva.gaah-e-husn kee ra'anaaiyaaN
vajd meiN laati haiN Khaas-o-'aam ko!

mil gayee hai manzil-e-me'raaj-e-'ishq
chhoR kar tafheem-o-istifhaam ko!

jee meiN hai kar looN tavaaf-e-koo-e-dost
oRh kar ab jaama`e-ehraam ko

gar naheeN, 'naadaaN,' muqaddar meiN tire
DhooNDtaa hai kyoN 'abas ilhaam ko?

(JANUARY 31, 2005 - ARLINGTON, TX - USA)

--
* matl'a from Haafez Shirazi, in Farsi:
"saaqiyaa, bar.Khez-o-dar deh jaam raa
Khaak.bar.sar kon Gham-e-ayyaam raa"




Saturday, January 29, 2005

Ghazal 44: kyaa bataayeN kih hai kyaa deed-e-ruKh-e-yaar ka lutf!*




kyaa bataayeN k. hai kyaa deed-e-ruKh-e-yaar ka lutf!
jaise maikash ko mile saaGhar-e-sarshaar ka lutf

uski har tarz-e-gul.afshaani-e-guftaar ka lutf!
marhabaa, anjuman.aaraai-e-sarkaar ka lutf!

naaz-o-andaaz-o-adaa, shoKhi-o-pindaar ka lutf!
kya bayaaN keejiye us husn ke atvaar ka lutf!

==::Q::==
fasl-e-gul meiN bhi uThaanaa hi paRaa Khaar ka lutf
meri taqdeer meiN thaa kab gul-o-gulzaar ka lutf?

bazm-e-farhat, na koee anjuman-e- 'aish-o-tarab!
saaz-e-pur.soz, na paa.zeb ki jhankaar ka lutf!

ranj-e- naumeedi-e-jaaved ka maaraa huaa dil!
ham.navaa hai, na kaheeN suhbat-e-Gham.Khwaar ka lutf!
==::::==

haaye voh ambareeN kaakul, voh qad-e-sarv-e-sahee!
kaash haasil ho kabhi yooN rasan-o-daar ka lutf (1)

ham ne maana k. bahaaroN ka yeh mausam hai, magar
dil agar shaad na ho, kyaa mile gulzaar ka lutf?

dushman-e-dil hai barahman, hai 'udoo 'aql ka shaiKh
ab na tasbeeh ki lazzat hai, na zunnaar ka lutf!

gar na ho Gham to Khushi ke haiN bhalaa kyaa m'ani?
lutf hota hai kaheeN 'ishrat-e-bisyaar ka lutf?

chheRti rehti hai rag rag ko yeh mizraab-e-alam
aur uThaata hooN bahut shauq se har taar ka lutf

pursish-e-haal ki chaahat, na zaroorat hai mujhe
'ishq meiN sab se judaa hai dil-e-beemaar ka lutf!

maa'il-e-sh'er kiyaa, de ke, usee ne 'naadaaN'
tab'a`e-naazuk, jigar-e- tishna`e-aazaar ka lutf!


(JANUARY 29, 2005 - ARLINGTON, TX - USA)

--
* zameen conceived by U.V.Ravindra "Khursheed" (May 2003)

(1):
qad-o-gesoo meiN Qais-o-Kohkan kee aazmaaish hai
jahaaN ham haiN vahaaN daar-o-rasan kee aazmaaish hai

[Ghalib]